भविन कार्की, संखुवासभा भदौ २८
संखुवासभामा निषेधाज्ञा कफ्र्यु हटेपछि सदरमुकाम खाँदबारी लगायतका बजार क्षेत्रमा पनि चहलपहल बढेको छ । कफ्र्यु र निषेधाज्ञा हटेसँगै आज (शनिबार) देखि बजार क्षेत्रमा चहलपहल बढेको हो । जिल्ला प्रशासन कार्यालयमा आज बसेको जिल्ला सुरक्षा समितिको बैठकले केही दिन यता देखि लाग्दै आएको निषेधाज्ञा कफ्र्यु हटाएको छ ।
देशको परिवर्तित अवस्था र जिल्ला भित्रको सुरक्षा ब्यवस्था समेतलाई बिश्लेषण गर्दै आज (शनिबार) १ बजे देखि निषेधाज्ञा हटाइएको संखुवासभाका प्रमुख जिल्ला अधिकारी सिर्जना थपलियाले बताउनुभयो । निषेधाज्ञा कफ्र्यु हटेपछि जिल्ला भित्र तथा धरान,इटहरी, विराटनगर लगायतका चल्ने सार्वजनिक बससँगै ट्याक्सी लगायतका सवारी साधन नियमित रूपमा सञ्चालनमा आएका छन् । सदरमुकाम खाँदबाररी सहितका बजारमा जनजीवन सहज हुँदै गएपछि पसलहरू खुल्न थालेका छन् ।
निषेधाज्ञा कफ्र्यु हटेपनि जेनजीको आन्दोलनका कारण काठमाडौँ उपत्यका लगायत देशका विभिन्न जिल्लाबाट भागेका कैदीबन्दी आउन सक्ने भएका कारण जिल्लाको सुरक्षा ब्यवस्था कडा पारिएको छ । जिल्लामा पछिल्लो समय अन्यत्र बाट समेत मानिसहरु आउन थालेको र विभिन्न कारागारबाट भागेका कैदी बन्दी छिर्न सक्ने भएका कारण नेपाली सेना, सशस्त्र प्रहरी र नेपाल प्रहरीले संयुक्त रुपमा मुख्य चोक–चोकमा सेनाको कडा सुरक्षा जाँच तिब पारेका छन् । त्यस्तैगरी सुरक्षाको कमाण्ड पाएसँगै इन्द्र दल गुल्म खाँदबारीले जिल्ला कारागार सहित महत्वपूर्ण सरकारी कार्यालयमा नेपाली सेनालाई खटाएको छ । सम्भावित घटना हुन नदिन सुरक्षा सर्तकता अपनाउँदै सेनालाई खटाइएको इन्द्र दल गुल्मले जिल्ला कारागार सहित महत्वपूर्ण सरकारी कार्यालयमा प्रहरी सँगै नेपाली सेना खटिएको छ ।
